Oh, la mè gioia, avi lu sunnuzzu,
si strica l’occhi cu la so manuzza,
ma un ti scantari, chi la to mammuzza
vagghiardu già ti conza la nacuzza.
Pigghiu nna corda e l’appennu a lu muru,
all’autru croccu lu chiuvu ci assicuru ,
du pizzuddi di canna di ogni latu
di la cutra, e lu lettu è già cunsatu.
Tiru la corda e ntantu tu ti sciali,
lu iriteddu ti metti s sucari,
ti senti supra l’unni di lu mari
chi a ninnaredda ti vennu a cantari.
Tu voli comu fussi nn’ancileddu
chi un satu ncapu u’ cielu voli fari,
ma pò vidennu a tia curuzzu beddu
supra sta terra voli riturnari,
” E ninna oh…” ti canta lu me amuri,
vola e poi torna supra lu me cori,
mancu lu re, chi puru è picciriddu
dormi accussi dintra lu so casteddu.
E veni e va comu na farfaledda
chi talia ncantata i tò biddizzi
e ti dici, sbattennu li so aluzzi:
” Dormi sirenue chiuditi l’occhiuzzi..”
La naca è fatta cu na curdicedda,
nna cutrae du pizzuddi di cannuzzi,
idda ‘tannaca dintra li so razza
comu si ti strincissi la mammuzza.
Maria Molinari
Partanna
Partanna, tu si dintra a lu me cori,
sì comu un cantu di puisia e d’amuri,
sì nu jardinu chi mmezzu a li sciuri
pari nna pinziddata di culuri.
Lu suli supra a tia scinni cucenti
e li lumii d’oru su splimenti
e ntra li pali di ficudini
sali lu ciauru di li gersumini.
Nna notti ti scutiu lu tirrimotu,
caderu n’terra chiesi e n’arrivotu
di scossi e di maceri tutti n’terra,
eramu m’paci e vittimu la guerra.
Sutta li tenni e dintra li baracchi
ntunnu a lu focu faciumu bivacchi,
passaru l’anni e tuttu riturnau
com’era prima e rifiuriu lu maiu.
Ora si nna rigina chi talia
di lu ” Camarru ” tutti li casuzzi,
comu mazzi di sciuri bianchi sunnu
pi fari nna curuna a lu tò regnu.
Li nnomu chi vi dicu li sapiti,
c’è la Via Crispi e pò la Via Cavour.
lu Carmelu, la Razia, e tutti i strati
su fatti di scinnuti e d’acchianati.
La Villa, la Matrici e lu Casteddu,
lu Corsu, lu Culleggiu e u ‘ Nsalateddu ,
Via Palermo, d’Italia lu viali
e san Francesco cu lu campanili.
Ci sù puru funtani d’acqua frisca
cu lu cannolu chi abbunnanti scruscia:
Bisasina, lu Frascinu, a ‘ Tunzedda,
Ciuritu, u ‘ Canalotto e a’ Bacaredda
C’è poì l’usanza di manciari così
chi hannu sapuri forti e diliziusi
la pasta cu li sardi e finocchietti,
chidda cu l’agghia e milinciani fritti.
Pani cunzatu e maccaruneddi,
poì l’agghia schesa e li babbaluceddi,
la sarsa lorda, li sfingi, a ‘ capunata,
cannola, cassateddi e pignulata.
Paisi miu, ti portu ntra lu cori
e pensu a tia cu tuttu le mè amuri,
quannu luntanu assai sugnu di tia
sentu ntra l’arma tanta nustragia.
Partanna mia tu si tutti sti cosi,
si nu ricamu e nnu suspiru i ‘rosi,
sì vita,sì sapuri, sì allegria,
vuci d’amuri e cantu di puisia.
Maria Molinari ( da Pizzuddi di Cori)
